Shenjat dhe simptomat e hipotiroidizmit

Pa prezencën e hormoneve të tiroides asnjë qënie njerëzore nuk do të jetonte dot, apo trupi ynë nuk do të ishte në gjendje të kryente asnjë veprim fizik apo mendor.

Nga: Xhesjana Topalli

Publikimi: 21/12/2017 11:19

Roli i hormoneve të tiroides është t'i njohë dhe të veprojë mbi receptorët e tyre në qeliza në mënyrë që të rregullojë metabolizmin e çdo qelize. Kanë dhe funksione të tjera si në procesin e rritjes dhe zhvillimit mendor dhe fizik, ndihmon organizmin në adoptimin me temperaturat e jashtme, ndikojnë në forcimin e kockave, shtojnë oksigjenimin e çdo qelize.

Tiroidja si gjëndër endokrine i hedh direkt në gjak substancat që ajo prodhon. Më shumë se 99% të hormoneve të tiroides janë të lidhura me proteina dhe nuk janë aktive, vetëm pjesa e lirë e tyre është aktive.

Hipotiroidizmi

Është sëmundje që prek 2-3% të popullatës, më shumë prek gjininë femërore me raportin 3/1 me meshkujt. Në bazë të kësaj sëmundje qëndron ulja e prodhimit të hormoneve të tiroides e cila mund të jetë e pjesshme, e plotë. Kur kemi deficencë të plotë i sëmuri është në gjendje kome dhe rrezikon shumë për jetën.

Zakonisht kjo sëmundje shkaktohet nga dëmtimet kronike të gjendrës tiroide, shkaku më i shpeshtë është tiroiditi kronik që është me bazë auto imune dhe quhet Tiroiditi Hashimoto.

Shkaktarë të tjerë janë dëmtimet e tiroides nga viruset, medikamentet siç mund të jetë Kodaroni, Litiumi, kirurgjitë shpesh herë, kanceri i gjëndrës tiroide, dhe kirurgjia që kërkohet në të tilla raste çon në mos prodhim të hormoneve, edhe rrezatimet me jod radioaktiv e dëmtojnë shumë gjëndrën tiroide dhe predispozojnë për ulje të funksionit të saj.

Kjo sëmundje haset më shumë në moshat mbi 50 vjeç por mund të ndodhë edhe tek fëmijët e porsalindur. Kjo e fundit është gjendje e rëndë që duhet të diagnostikohet dhe trajtohet shpejt, maksimumi brenda vitit të parë të jetës sepse këto fëmijë përndryshe do mbeten me prapambetje mendore ose siç njihet ndryshe me emrin Kretinizëm

Gjendra tiroide stimulohet për të prodhuar hormonet e saj nga një hormon tjetër që quhet TSH( Thyroid Stymating Hormon) ky hormon vjen nga gjëndra e hipofizës.

Kur kjo gjëndër nuk e prodhon siç duhet hormonin kemi të bëjmë me mos stimulim të tiroides dhe hipotireozë dytësore.

Kur dëmtimet janë vetëm në gjëndrën tiroide kemi të bëjmë me hipotireozë primare.